UNIÓN LIBRE - CADERNOS DE VIDA E CULTURAS - EDICIÓS DO CASTRO

CARMEN BLANCO

Presentación

Escritora lucense. Centrouse especialmente nas interrelacións de poder, muller, sexo, cultura e literatura, temática na que abriu camiño en Galicia cos libros Literatura galega da muller, Escritoras galegas, Libros de mulleres, O contradiscurso das mulleres, Nais, damas, prostitutas e feirantas, Mulleres e independencia, El contradiscurso de las mujeres (versión actualizada da obra homónima traducida por Olga Novo), Luz Pozo Garza: a ave do norte e Alba de mulleres. Promoveu o feminismo independente en Galicia dende os anos setenta.

É profesora de Literatura Galega da Universidade de Santiago de Compostela no Campus de Lugo, pero anteriormente o foi de Lingua e Literatura Españolas de Ensinanza Media e de Lingua e Literatura Galegas tanto de Ensinanza Media como de Maxisterio. Coordina, con Claudio Rodríguez Fer, Unión libre. Cadernos de vida e culturas, onde dirixiu o monográfico “Mulleres escritoras”. Publicou diversos debuxos e deseños nos anos oitenta e relatos dende os noventa, estes reunidos no libro Vermella con lobos. Utliza así mesmo o seudónimo de Emma Luaces en homenaxe a Emma Goldman e á súa liñaxe materna.

Sobre literatura e cultura galega publicou os libros Conversas con Carballo Calero e Carballo Calero: política e cultura, así como diversas edicións introducidas de autores contemporáneos: Códice Calixtino de Luz Pozo Garza e, en colaboración con Claudio Rodríguez Fer, Con pólvora e magnolias de X. L. Méndez Ferrín e Os eidos de Uxío Novoneyra. Así mesmo é autora de numerosos ensaios e estudos en distintos medios periodísticos e libros colectivos.

Ver bibliografía de Carmen Blanco